كل الحدايق اللي في ديرتي محيوسه وما تشجع لقضاء وقت ممتع مع ثلاجة شاهي وشوي مكسرات ولا يهون بسكوت جلوكوز عشان الطاقه
استخرت ذات حزه وقررت اني اروح لندن منها اشطف حدايقهم واشوف هم مثلنا ولا يختلفون
شديت الرحال وتوكلت على الله ورحت هناك اخذت معي في شنطتي بسكوت ابو ولد (( لزوم أغط على الشاهي ))
ويوم وصلت هناك ركبت تكسي وقلت له (( بليز ادعس تو ذا هايد بارك )) هز راسه وكلها خمس دقايق وحنا واصلين عند المدخل حقها عطيته جنيه استرليني
وحولت ووقفت اتأمل منظر الحديقه الجذاب بصراحه شي ما صدقته
لعنبوا ابليسهم مراجيحهم نظيفه ومريحه مهيب حقاتنا اللي رابطين لك كفر ددسن
طاقته الشمس ومتنحل بعد من زين الطبايع راعيه مهوب يدخل به الا عرض مع كل لفه
وهذا غير ان نصف المراجيح مكسره والزحليقه عندهم تقصّر وانت تقول ناعمه وطويله تقعد خمس دقايق ما وصلت الارض
اما عندنا تلقى الزحليقه كنها مبشره جبن كرافت ولو يتزحلق الواحد انشق ثوبه او على الاقل ما قام منها الا ولعبه مونوبولي طابعتن في مقفاه ههههههههههههههههه
هذا غير انهم يقصون الشجر على الشكل اللي هم يبونه ما تعوق معهم تلقاهم حاطين لك شجره على شكل واحدن يتمغّط والايتزلج
وحنا العامل حق حديقتنا جلس يوم كامل يبي يسوي الشجره على شكل مثلث الين صارت كنها جبنه البقره الضاحكه #):
المهم .. قعدت اتمشى فيها وكان فيها عوايل وبحكم عاداتنا طلعت منها وانا متضايق على اني موافق يوم العوايل عندهم ووقفت عند المدخل انتظرهم يروحون
وكل شوي يدخل شلة شباب ويطلعون .. خيرر ؟؟
انقهرت ووقفت واحد جاي بيدخل (( هي مان ستوب بليز )) رد علي (( وآآآي )) قلت له (( ذير إز وومن انسايد دونت قو ))
صرخ بوجهي وقال (( شرب يو مان )) ودفني
الين صدمت في برميل زباله واتقلب الين ردتني عجوز باسطه عند المدخل اثرها تبيع بليله وكم شباصه
وجلست اتفرج شوي وشريت منها (( شباصه)) عن قولة ما شريت ونزّلت راسي بحب راسها تقديرا واحتراما والا يوم لزختني بالمهفه مع خشتي الين تقاطرت سعابيلي
وقامت من مكانها تبي تكمل علي وانا انحاش الظاهر تحسبني اتحرش بها
وقلت لها (( من زينك عاد انتي وجدايلك اللي كنهن ذنب قطو يلعب به على جدار ))
المهم .. يوم شفت الدعوي خليطي وخربانه قلت اخربها وش زودي وادخل الحديقه ورحت لاقرب كرسي
باستكشف الوضع واتليّن شوي المهم دخل واحد عمره صافقن 130 ( متجاوز السرعه الاخ خخخخخخخ )
يمشي على عصاه ناحرن الكرسي اللي انا فيه عاد انا من الفضاوه قاعدن افرم خشتي في هالعلوك
يوم جا يجلس هالآدمي طق فيني عرق (النذالة) (<---- اخذ النذاله من مرعيه خخخخخخخخ)
وطلعت العلك من فمي وفرشته بيدي على مكانه مثل العجينه هههههههه
لين غدا العلك كنه خبزه وجلس الشايب يناظر ويتمقل في ربوع الحديقه واشوفه مسكين كل ما جا يزيّن جلسته او يتعدل ما قوى
كنّه مسمّر ويوم شفت العصا تطقطق الارض حطيت رجلي وانحشت خفت لايكون عرف اني انا اللي حطيت له العلك خخخخخخخخخخخخ
ورحت اجلس لحالي عند شجره على شكل ديناصور
تظللت تحت ذنبه وانسدحت شوي
وفجأة جتني بنت حمرا (( هاي )) انا اختبصت وسروالي مع التسدح وصل لين ركبي
تخبرون لابس سروال وزارة المعارف ذاك اللي منقّط وتحته سحّاب
<----- مسوي برمودا هو ووجهه هههههههههههههههههه
وشلون اجل لو ابطى وامي الله يهديها غاسلته بكلوركس له سنه مفتوح غطاه وناشرته في السطح عز الظهر الين شمّر
ومن زين الطبايع قاعد اتسدح بفنيله العلاق المشخوله مسوي موضه
المهم تواسيت وزينت لها مكان وجلست جنبي وقالت (( هاو آر يو ؟؟ )) وحبيت استظرف وقلت (( كلينكس ))
قالت (( وآآت ؟؟ )) قلت لها (( فآآآآآآآآين ))
ردت علي وقالت (( اجل امسح خشتك به )) استغربت ردها وسألتها (( انتي عربيه ؟؟ )) قالت (( ايه عربيه وعرفت انك من الجماعه يوم شفت عصاقيلك وركبك المقحله ))
وقالت ان بيتها قريب ودايم تجي على رجليها تغير جو
المهم عرّفتها على اسمي وقلت لها (( معك الدحمي ويدلعوني دح دح او دحومي ونايس تو ميت يو ماي فرينده ))
سحبتني مع يدي وعلى المراجيح
وقعدت انا وياها نتمرجح وانا عاد دفش شوي باللعب متعود على البثاره هناك ما طلع الصعارير اللي براسي الا مزحات عيال الحاره
قعدت ادفها في المرجيحه وكل مالها تبعد عني ومرة ادفها بيدي ومرة برجلي اقوى وهي تصارخ
واحسبها تزاعق من الفرحه ويوم رجعت لي دفيتها بكل ما عندي والا يوم طمرت ونشبت في قلب الشجره
رحت عندها وتعذرت منها وطيبت خاطرها بكلمتين الين رضت وهي كلها رضوض ورحت للشجره اواسي غصونها المايله واظف المتكسر منها
ويوم ناظرت حولي والا اللي بالحديقه متجمعين على شكل دائره وجا واحد منهم ومسكني مع يدي وقعد يهاوش ويأشر على الشجره عاد خويتي علمتني انه يبي غرامه
وهذا نظام عندهم قلت له خلاص بوصي ولد خالي يشحن شجرة من ديرتنا ونركزها بدالها
المهم صكني بقسيمه تخريب وراح هالماخوذ عاد انا حاولت ألطف الجو وقلت للي مجتمعين (( ما ودكم نلعب واحد طيش ... استغمايه ... ))
وعلمتهم طريقتها وقعدت أعد الين 20 والتفت وما لقيت احد رحت ادور ولقيت واحد مبوبز عند شجره
واجيه من وراه وارجفه والا يوم تكرفس على وجهه عاد هو تقبّل الوضع يحسب الرجف من اصول اللعبه وجازت لي الدعوى
رحت ادور الثاني والقاه مسوي روحه شجره ورافع يده كنها غصن وفاتح كشرته مدري ليش
جيت عنده ومعي عسيب (( ايه عندهم نخل هناك عاد تحصل في اكبر الحدايق ))
ولشطته مع ظهره وقام يناقز من قوة الطقه ويوم شافوني اسوي بهم كذا تناحشوا كلهم برا الحديقه
ما عاد بقى احد ويوم طيحت اللي براسي وجيت اطلع وأشوف الشايب خويي اللي حطيت له علك
الى الحين وهو ناشب فيه المسكين وما غير يقلّب في الجريده حتى الاعلانات حفظها
هههههههههههههههههههههه
انا حسيت بتأنيب الضمير المستتر ومسكته مع عصاه وسحبته ومن فرحته بمعانقة الحريه عطاني 3 جنيهات استرلينيه
الضعيف ما درى اني حطيت له العلك هع هع هع هع
المهم طلعت من الحديقه وركبت تكسي ناوي الرجعه وانا بالطريق لمحت نهر التايمز حقهم
وفجأة تحركت فيني دوافع السباحه وقلت للسواق (( ستوب هير بليز ))
ونزلت على طول وطلعت فوق الجسر وفصخت ثوبي والفنيله
وانقز من فوق قمزتن مخلوطه بصرخه واطب لك هاك الطبه رويسيه على كيف كيفك
وينهبلون السواح ويبلغون حاله طوارئ ان فيه حاله انتحار
ويجونك بالقوارب علي وانا على ظهري ومسترخي ونافخ بطني بالهوا عشان يطفح بي
ويشقلوني عندهم وخذ يا تحقيقات وعلمتهم اني قاعد اتحمم وان مطافشي لمصلحتهم عشان اجذب السواح
واني ما صدقت القى زي هالنهر الصافي واني مليت من بركتن عندنا اذا طبيت فيها طلعت اخضر من الطحالب
وما صدقو خبر اعجبتهم التصريفه ومشت عليهم فكره التنشيط السياحي
ويلقطني رئيسهم ويوقع معي عقد اي نقزه من فوق الجسر معها حركه حلوه (( رويسيه او محيفره او خلفيه )) بيعطيني 50 جنيه
يا بلااااااااااااااااااااااااش
اصرفو لي ملابس خاصه ورفضتها اجل بالله عليكم معطيني (( مايوه )) وجع يوجعهم ويقطعهم هههههههه
ما مثل صروال السنه اذا دبّلته عشان ما يشفّ
<<<<<<<< من زينك انت ووجهك
المهم وقعت معهم عقد كل 10 طبات مقابل 500 جنيه ويوم جت الطبه الخامسه مليت منهم ومزاعقهم وابي الفكه
قلت مالي الا اني اغطس واسبح وانا كاتم نفسي لين ابعدت عنهم وطلعت من جهه ثانيه تطل على اطراف النهر
وعلى طول ركبت تكسي واقرب محل ملابس ثم المطار وهم يا حبة عين أمهم قاعدين يدوروني تحت الماء على باليهم غرقت وفي عداد الموتى
والى الحين وهم يدوروني حتى اعداد هذا الموضوع
طبعا شافو سروال السنه طافح وقعدوا يدورون تحته
شفتو الفايده الثانيه لتدبيل السروال #):
مايستفاد من القصه :
1- السياحه الداخليه افضل مليون مره من السياحه الخارجيه ,
حتى لو قالوا عوائل تحمل ياشيخ هههههههههههههه
2- لو اجبرتك الظروف بسفرك للخارج ,
فخلهم ياخذون فكره حسنه عن بلدك بتصرفاتك
3- اذا قررت السفر لدوله اجنبيه فعليك فهم لغتهم ( سامع يارحله امل خخخخخخخخخخخخخخ )
ارق التحايا
دحومي